- автор Айгерим Акылбекова
Москва облусу эки күн катары менен дрон чабуулуна кабылды. 6-майга караган түнү Москванын Кызыл аянтынын 11 чакырым жерде дрон жок кылынганы кабарланды.
Шейшембиге караган түнү Орусиянын "Шахед" дрондору менен Одесса облусуна болгон чабуулда бир адам набыт болду. Жергиликтүү бийлик шаардагы инфратүзүмдөр жабыркап, өрт тутанганын билдирди.
Одесса облусунун Черноморск шаарынын мэри Василий Гуляев шаар тургундары арасында жабыркагандар жоктугун билдирди:
"Мына бул жакта адамдар турат. Бул үйдө биринчи топтогу эки майы жашарын айтышты. Кудай сактап, алар бул маалда үйдө жок экен. Аларды алып кеткен туугандарына рахмат. Алдын ала маалымат боюнча биздин шаарда жабыркагандар жок. Терезелер сынып, үйлөр жабыркады.
Түнкү саат үчтө Харьковдо орус армиясынын дрон чабуулунда эки киши жараат алганын жергиликтүү бийлик жарыялады. Маалыматка караганда, өлкөнүн экинчи чоң шаарында 6-майга караган түнү кеминде 20 жарылуу болгон. Бир нече турак үй, ашкананын имараттарын өрт каптады. Чабуул эки саатка созулганы, шаардын төрт району бутага алынганы кабарланды.
Соккунун кесепетинен Харьковдогу чоң базардын бири өрттөнүп кетти. Маалыматка караганда төрт адам ооруканага жеткирилди.
"Шахед" учуп келип эле жарылуу болду. Дароо өрт өчүрүүчүлөрдү чакырып, эл менен кошо өчүрө баштадык. Элди коркутуп, чабуул жасашканы - террорчулук", - деди Харьковдун тургуну Денис Залинский.
Өткөн түнү Орусия да дрон чабуулуна кабылганы маалым болду.
6-майда эртең менен Москванын аба майдандарына, Волгоград, Самара, Иванов, Калуга, Нижний Новгород жана Ярославль шаарларында аэропортторго киргизилген чектөө алынганы айтылды.
Орусиянын Коргоо министрлиги Москванын жана Москва облусунун аймагында 19 учкучсуз учак атып түшүрүлгөнүн кабарлады.
Жергиликтүү телеграм-каналдар Москванын Кызыл аянтынан 11 чакырым жерде “Каширская” метро станциясына дрон сыныктары түшкөнүн жазышты. Москванын мэри Сергей Собянин ал жерде куткаруучулар иштеп жатканын билдирди.
"Москва шаарын көздөй учурулган 19 дрон атып түшүрүлдү. Жабыркагандар жана кыйроо жок. Окуя болгон жерде тиешелүү кызматкерлер иштеп жатышат".
Бир күн мурун Подольск шаарына жакын жерде төрт дрон атып түшүрүлгөн. Москва облусуна март айында да дрон менен чабуул болгону кабарланган.
Аба соккуларынан улам Казан жана Нижнекамск аэропорттору коопсуздукка байланыштуу убактылуу жабылганын Росавиация жарыялады.
Ал арада АКШ лидери Дональд Трамп орус президенти Владимир Путиндин Жеңиш күнүнө байланыштуу Украинада ок атышууну үч күнгө токтотуу сунушун кубаттады.
"Президент Путин үч күндүк ок атышууну токтотууну жарыялады, бул анчалык деле узак сезилбеши мүмкүн, бирок чындыгында бул көп. Баары эмнеден башталганын билебиз... Путин менен үч жыл сүйлөшпөгөн президентибиз болду. Азыркы нерсенин бири да, бул согуш да болбошу керек эле".
Буга чейин Украинанын президенти Владимир Зеленский Путиндин бул сунушун четке кагып, ок атууну токтотууну күтүп отуруунун кажети жоктугун айткан.
Зеленский ошондой эле АКШ сунуштаган 30 күнгө ок атууну токтотуу демилгеси дагы эле күчүндө экенин эске салды. Ушуну менен соңку бир айда Кремль ок атууну убактылуу токтотууну экинчи ирет сунуштады. Буга чейин Пасха майрамын утурлай ок аптоо режими жарыяланган. Бирок эки тарап тең анын шартын бузуп, бири-бирин айыптаган.
Орусиянын Казан жана Нижнекамск аэропорттору коопсуздукка байланыштуу убактылуу жабылганын Росавиация жарыялады.
Түндө дрон чабуулуна байланыштуу жабылган аэропорттор акырындап ачылып жатканы кабарланды. Москванын аба майдандары, Волгоград, Самара, Иванов, Калуга, Нижний Новгород жана Ярославль шаарларында аэропорттордун ишине киргизилген чектөө алынганы айтылды.
5-майдан 6-майга оогон түнү Орусия украиндердин дрон чабуулуна кабылганын билдирген.
Ага чейин Орусиянын армиясы Украинанын аймактарына жапырт сокку урган.
Харьковдо 6-майга караган түнү Орусиянын дрон чабуулунда эки киши жараат алганын шаардын мэри Игорь Терехов Телеграмга жазды.
Терехов чабуул эки саатка созулганын, шаардын төрт району бутага алынганын билдирди.
Соккунун кесепетинен Харьковдогу чоң базарлардын биринде өрт чыккан.
5-майга караган түнү Москва облусунун Подольск шаарына жакын жерде төрт дрон атып түшүрүлдү. Бул тууралуу Москва шаарынын мэри Сергей Собянин Телеграм-каналына жазды.
Мэр жабыркагандар жана кыйроо жоктугун жазды.
Подольск Москванын түштүк тарабына жакын жайгашкан шаар. Абадан коргонуу системаларынын интерактивдүү картасынан көрүнүп тургандай шаар туш тараптан "Панцирь" зениттик-ракеталык коргонуу комплекси менен курчалган.
Орусиянын Коргоо министрлиги да Москва облусуна өткөн түнү учурулган төрт дрон тууралуу расмий кабар таратты.
Украина бул тууралуу комментарий бере элек. Өткөн түндөрү украиндердин учкучсуз аппараттары аннексияланган Крымдагы, Краснодар крайындагы жайларды бутага алганы маалым болгон.
Москва облусуна буга чейин март айында да дрон менен чабуул болгону кабарланган.
Орусиянын Коргоо министрлиги 4-майдын кечинде өлкө аймагы боюнча 26 украиналык дрон атып түшүрүлгөнүн билдирди.
Министрликтин маалыматында, 17 дрон Брянск облусунун аймагынан, бешөө Калугадан атып түшүрүлгөн.